•陳美齡帶埋（後排左起）丈夫金子力、二仔昇平、細仔協平及大仔和平慶祝母親90歲大壽。
•（左起）陳美齡、母親陳彭端淑、陳曦齡及陳依齡筵開6席賀大壽。
•陳美齡與二家姐陳曦齡合唱《媽媽好》送給母親。
當年憑《香港香港》一曲唱到街知巷聞嘅陳美齡（Agnes），嫁咗畀日籍丈夫金子力後，都好少喺香港見到佢。不過前晚Agnes聯同六兄弟姊妹一齊為母親陳彭端淑擺壽宴，筵開6席慶祝90歲大壽，每枱都有一大塊「90」字樣嘅波板糖，認真有童真。
似乎「唔識老」嘅陳美齡，唔止帶埋丈夫金子力由東京返港，三個囝囝和平、昇平及協平亦都專程從美國返港為婆婆慶祝。90歲嘅陳媽媽精神非常，步行亦只需稍為攙扶，見到兒孫滿堂更笑逐顏開。陳美齡更與二家姐陳曦齡合唱《媽媽好》祝壽，然後一班仔女、孫仔孫女都一齊陪陳媽媽切蛋糕，場面溫馨。
頻頻返港陪媽咪
陳美齡透露送咗一個銀碟盤畀媽咪做生日禮物：「不過媽咪見到啲孫仔已經係最開心嘅禮物。今次幫媽咪擺大壽，係因為家姐同細佬傾偈嗰陣時建議，大家兄弟姊妹都好贊同等媽媽開心一下。不過我都要趕住第二日返日本出席活動，我都唔想離開媽咪太遠，媽咪年紀愈大愈唔捨得。（考慮返港居住？）最大問題係我老公唔識廣東話，香港佢又無乜朋友，所以佢未必接受。不過自己就會多啲返港陪媽咪，一年返嚟四、五次，反正三個仔都大晒，全部喺美國讀書同工作，唔使太過緊張。」
認錯囝囝女朋友
講到三個囝囝，陳美齡透露大仔和平已經28歲、昇平25歲，而協平亦已18歲，細仔今年考大學，三個仔都已拍拖：「我無規定佢哋交女朋友要乜國籍。無所謂啦，都慣咗佢哋同鬼妹拍拖，都好好女仔嘅。」
Agnes更大爆由於三個仔都很有女人緣，所以經常換畫，更試過擺烏龍認錯二仔嘅女朋友：「唔知點解硬係覺得佢哋都好似樣咁，試過有次見到我話：『好耐無見你喇。』點知個女仔就好尷尬答我：『Auntie，我哋第一次見面咋。』
